«Хәзинә» галереясында «Мирас һәм традицияләр» күргәзмәсе буенча түләүсез экскурсия узачак

(Казан шәһәре KZN.RU, 10 нчы август). 12 нче августта Татарстан Республикасы Дәүләт сынлы сәнгать музееның «Хәзинә» милли сәнгать галереясында «Мирас һәм традицияләр» күргәзмәсе буенча түләүсез экскурсия узачак. Экспозициядә – атказанган рәссамнар һәм осталарның сынлы һәм декоратив-гамәли сәнгать эшләре.

Күргәзмә буенча экскурсияне проектның кураторы, «Декоратив-гамәли сәнгать рәссамнарының иҗат берлеге» төбәкара иҗтимагый оешмасы директоры Сергей Коломийцев үткәрәчәк, дип хәбәр итә ТР Дәүләт сынлы сәнгать музееның матбугат хезмәте.

Чара 16:00 сәгатьтә башлана, алдан теркәлү өчен +7(843)567-80-43 телефоны буенча яки «Вконтакте» социаль челтәрендәге галерея берләшмәсе аша хәбәр итәргә кирәк.